„ოქროკუდა“ ხობში სიმინდის ყანებს შეესია

11.06.2012

ხობის მუნიციპალიტეტში დღეს მატლის ახალი სახეობის „ოქროკუდას“ გავრცელების მიზეზების და ვითარების გასარკვევად სურსათის უვნებლობის და ვეტერინარიის დეპარტამენტის უფროსის მოადგილე ზურაბ ბეჟაშვილი იმყოფებოდა. ორჯერ თერმული და შხამქიმიკატებით შეწამვლის მიუხედავად მატლმა ხილის ნარგავები და თხილი გაანადგურა და სიმინდის ყანებს მოედო. „ოქროკუდა“ ტყის მასივშია მომრავლებული და მოსახლეობით დასახლებულ ტერიტორიაზეც ვრცელდება. მოსახლეობა შიშობს, რომ შესაძლოა თხილის მოსავალი ვერ აიღოს. ზურაბ ბეჟაშვილის განცხადებით, ამ პირობების გათვალისწინებით სავარაუდოდ რუქაზე მონიშნავენ შესაწამლი ტყის მოცულობას და ავიაციას დაიხმარენ. ამ დრომდე მძიმე ვითარებაა ხობის მუნიციპალიტეტის ათ სოფელში. მოსახლეობა შესაწამლი აპარატის საშუალებით საკუთარ კარ–მიდამოს წამლავს. შეგახსენებთ, ხობის მუნიციპალიტეტში „ოქროკუდას“ სახეობის მატლი მაისის თვეში გავრცელდა.