07.06.2013

„ბანკ რესპუბლიკას“ ფოთის ფილიალი იუბილარია


უკვე 5 წელია რაც ფოთში ,,ბანკ რესპუბლიკა''-ს ფილიალი ფუნქციონირებს. სერვის-ცენტრს 10 ათასამდე მომხმარებელი ჰყავს. 

,,მეცხრე ტალღა"  http://nwbc.ge.

14.12.2012

ხობის გამგებლის მოვალეობას კახა ბენიძე შეასრულებს


ხობის მინიციპალიტეტის გამგებლის მოვალეობას კახა ბენიძე შეასრულებს. შესაბამისი გადაწყვეტილება ხობის საკრებულომ ხმათა უმრავლესობით დღეს, 14 დეკემბერს გამართულ სხდომაზე მიიღო.

„ეს დიდი პასუხისმგებლობაა. არ იქნება ეს მარტივი საქმე. შემოვიკრებ პროფესიონალებს, გამოვიყენებ ადგილობრივ რესურს და იმედია ყველაფერი გამომივა“, – განაცხადა კახა ბენიძემ.

რაც შეეხება საკადრო ცვლილებებს, გამგებლის მოვალეობის შემსრულებლის თქმით, ცვლილებები იქნება, მაგრამ არა მასშტაბური.

პოლიტიკური კოალიცია „ქართული ოცნების“ წევრი, კახა ბენიძე 1974 წლის 9 აგვისტოს ხობში დაიბადა. დაამთავრა თბილისის ივანე ჯავახიშვილის სახელობის უნივერსიტეტის, ეკონომიკის ფაკულტეტი. წლების განმავლობაში მუშაობდა სხვადსხვა თანამდებობეზე ხობში.

ხობის ყოფილი გამგებელის, გოგა ღურწკაიას განცხადება თანამდებობის დატოვების შესახებ 7 დეკემბერს დააკმაყოფილა იმავე დღეს ხმათა უმრავლესობით არჩეულმა საკრებულოს თავმჯდომარემ, მამუკა ქარდავამ.

ადგილობრივი თვითმმართველობის შესახებ კანონის 39-ე მუხლის პირველი პუნქტის შესაბამისად, მუნიციპალიტეტის გამგებელს ირჩევს საკრებულო სიითი შემადგენლობის უმრავლესობით, თავისი უფლებამოსილების ვადით. ამავე კანონის, მეორე პუნქტის თანახმად, გამგებლის კანდიდატურა კონკურსის წესით ირჩევა. გამგებლის თანამდებობაზე ვაკანსიის წარმოშობიდან 14 კალენდარული დღის განმავლობაში საკრებულოს ბიურო იღებს განცხადებებს. ბიურო მიღებული განცხადებებიდან არჩევს კვალიფიციურ კანდიდატებს და წარუდგენს საკრებულოს. გამგებელი არჩეულად ჩაითვლება, თუ მის კანდიდატურას მხარი დაუჭირა საკრებულოს სიითი შემადგენლობის ნახევარზე მეტმა.

23.11.2012

ქვემო ქვალონის მოსახლეობა სოფლის რწმუნებულის გადადგომას მოითხოვს



23.11.2012
ხობის მუნიციპალიტეტის სოფელ ქვემო ქვალონის მოსახლეობამ, სოფლის რწმუნებულის, ელგუჯა ლაგვილავას გადადგომის მოთხოვნით დღეს, 23 ნოემბერს საპროტესტო აქცია გამართა. სოფლის მკვიდრთა თქმით, ედუარდ შევარდნაძის პრეზიდენტობიდან დღემდე ელგუჯა ლაგვილავა სოფლის რწმუნებულის თანამდებობაზე იმყოფება. მოსახლეობამ აქციაზე გამოთქვა უკმაყოფილება, რომ მათ სხვადასხვა პრობლემების შესახებ არაერთხელ აცნობეს რწმუნებულს, თუმცა ელგუჯა ლაგვილავას ეს მოთხოვნები ყურად არ უღია.

მოსახლეობა ამბობს, რომ ისინი სოფლის საძოვრებს ორი წელია სიმინდის მოსაყვანად ამუშავებენ, თუმცა რწმუნებულმა მათ განუცხადა, რომ ვერ ისარგებლებენ ამ მიწებით, რადგან ეს ტერიტორია ჰოლანდიელებმა შეიძინეს. სოფლის მკვიდრთა თქმით, ელგუჯა ლაგვილავასგან ამ შინაარსის პასუხი მას შემდეგ მიიღეს, რაც მას მიწების დარეგისტრირების თხოვნის შესახებ აუწყეს.

თავის მხრივ, ელგუჯა ლაგვილავამ , რომელიც აქციაზე იმყოფებოდა განაცხადა, რომ მიწების საკითხი მისი კომპეტენცია არ არის და სამინისტროს პრეროგატივაა.

ქვემო ქვალონის მოსახლეობამ დღეს გამართულ საპროტესტო აქციაზე უგზოობასთან დაკავშირებული პრობლემების შესახებაც ისაუბრა. მათი თქმით, სოფლის მხოლოდ რამდენიმე უბანში მოიხრეშა გზები. რაც შეეხება დანარჩენ ტერიტორიას, სოფლის რწმუნებულმა მოსახლეობას ჯერ კიდევ არჩევნებამდე განუცხადა, რომ სამუშაოები არ ჩატარდება, რადგან აქ მცხოვრებთა დიდი ნაწილი ბიძინა ივანიშვილის მომხრეა.  

სოფლის მოსახლეობა აცხადებს, რომ თუ მათ პროტესტს შედეგი რ მოჰყვება, აქციებს მომავალშიც გამართავენ.

ხობისწყალში ნაპოვნი ახალგაზრდა ქალის ცხედრის იდენტიფიცირება მოხდა


23.11.2012

ხობში, მდინარე ხობისწყალში ცენტრალური ხიდის ქვეშ ნაპოვნი გარდაცვლილი ახალგაზრდა ქალი 1989 წელს დაბადებული ხობის მკვიდრი მარიამ შანგირაძეა. ამის შესახებ „ლაივპრესს“ ხობის სამაშველო სამსახურის უფროსმა, გოჩა არაჩემიამ განუცხადა. მისი ინფორმაციით, გოგონა სახლიდან შვიდი დღის წინ გავიდა, თუმცა მშობლებს იგი ნათესავის სახლში ეგულებოდათ. მოგვიანებით, როცა გაირკვა, რომ მათი შვილი ახლობლებთან არ იმყოფებოდა, პოლიციას განცხადებით მიმართეს. გარდაცვალებასთან დაკავშირებული სხვა დეტალები უცნობია. მარიამ შანგირაძის ცხედარი ამ დრომდე ზუგდიდის პროზექტურაში რჩება და მას ექსპერტიზა უტარდება.

ახალგაზრდა ქალის ცხედარი დღეს, 23 ნოემბერს დილით, მდინარე ხობისწყალში იპოვეს. 


15.11.2012

ყულევის ტერმინალის თანამშრომლებმა საპროტესტო აქცია გამართეს


15.11.2012

ყულევის ტერმინალის 33–მა თანამშრომელმა ტერმინალთან დღეს, 15 ნოემბერს საპროტესტო აქცია გამართა. ისინი შპს გლობალ „ოილთან“ გაფორმებული ხელშეკრულების პირობებს არ ეთანხმებიან, რომელსაც რამდენიმე დღის წინ შავი ზღვის სარკინიგზო ნავთობმცლელი ესტაკატა იჯარით გადაეცა. აქციის მონაწილეების თქმით, მათ იძულებით უხდებათ სამთვიანი ახალი ხელშკრულების გაფორმება. შიშობენ, რომ ახალი კონტრაქტორი კომპანია ვადის ამოწურვის შემდეგ მათთან თანამშრომლობას აღარ განაგრძობს და უსამსახუროდ დარჩებიან. აქციის მონაწილეებმა ძველ ხელშეკრულებაში გაწერილი პირობების შენარჩუნება მოითხოვეს. 

მათ ასევე ტერმინალიდან დათხოვნილი თანამშრომლების სამსახურში დაბრუნება სურთ. ისინი აცხადებენ, რომ მიუხედავად რამდენიმე მათგანის ძველ პოზიციებზე დაბრუნებისა, დანარჩენების დაბრუნებაც ტერმინალთან შეკრებილების ერთ–ერთი მოთხოვნაა.

აქციაზე იმყოფებოდა საქართველოს გაერთიანებული პროფკავშირების თავმჯდომარის მოადგილე, ილია ვერდაძე. მისი თქმით, ახალი ხელშეკრულების თანახმად ტერმინალის თანამშრომლები ვეღარ ისარგებლებენ პრივილეგიებით, რომლითაც ისინი ძველი შეთანხმების საფუძველზე სარგებლობდნენ. აღნიშნული, მისივე განმარტებით გულისხმობს, რომ თუკი ტერმინალი მუშაობას შეწყვეტდა, თანამშრომლები კომპენსაციას მიიღებდნენ. ილია ვერდაძის თქმით, ისინი კანონის შესაბამისად იმოქმედებენ და აქციის მონაწილეების ინტერესებს ბოლომდე დაიცავენ.

თავის მხრივ, შპს გლობალ „ოილის“ დირექტორმა, გელა ხუნწარიამ განაცხადა, რომ ის თანამშრომლებს უკეთეს პირობებს სთავაზობს. აქციების ინიცირებაში  კი მისი თქმით, ძველი ხელისუფლების ხელი ურევია.

ტერმინალის თანამშრომლებმა კომპნიის ადმინისტრაციას წერილობითაც მიმართეს. მოთხოვნების დაუკმაყოფლებლობის შემთხვევაში ამბობენ, რომ უფრო ფართომასშტაბიან აქციებს გამართავენ.

შეგახსენებთ, ყულევის ტერმინალის 200–მდე თანამშრომელმა გამაფრთხილებელი აქცია 10 ნოემბერს გამართა. ისინი გათავისუფლებული თანამშრომლების დაბრუნებას და ხელფასების გაზრდას მოითხოვდნენ. მაშინ ტერმინალის თანამშრომლების პარალელურად, სოფლის ცენტრში ადგილობრივი მოსახლეობის ნაწილმაც მოაწყო  საპროტესტო აქცია. მათ ტერმინალზე ადგილობრივების დასაქმება მოითხოვეს. 

02.10.2012

ხობის საოლქო კომისიამ ორ უბანზე არასაკმარისი ბიულეტენების შესახებ საჩივარი არ დააკმაყოფილა



02.10.2012
ხობის #66–ე ოლქში დღეს, 2 ოქტომბერს საოლქო საარჩევნო სხდომა გაიმართა, რომელსაც კომისიის ცამეტივე წევრი ესწრებოდა. სხდომაზე განიხილეს ორგანიზაცია „ახალი თაობა ახალი ინიციატივას“ საჩივარი, რომელიც #11 და #25–ე უბნებზე არასაკმარისი საარჩევნო ბიულეტენის აღმოჩენის ფაქტს შეეხებოდა. ამ მიზეზის საფუძველზე ორგანიზაციამ მოითხოვა პასუხისმგებლობა აღნიშნულ საკითხზე კომისიის თავმჯდომარეს და კომისიის წევრებს დაკისრებოდა, თუმცა  საჩივარი არ დაკმაყოფილდა, რომლის განხილვას არ ესწრებოდა თავად ორგანიზაციის წარმომადგენელი. #66–ე ოლქის თავმჯდომარემ, მინდია ლომაიამ განაცხადა, რომ ეს საკითხი მათ არ ეხებათ და საჩივრის შემომტანმა  ცენტრალურ საარჩევნო კომისიას უნდა მიმართოს.

 დღეს გამართულ სხდომაზე ასევე განიხილეს 1 ოქტომბრის არჩევნები. ოლქის თავმჯდომარის ცნობით, შემაჯამებელი ოქმები რამდნიმე დღეში დაიდება.

01.10.2012

ხობში მმართველი პარტია და მისი მაჟორიტარი დეპუტატობის კანდიდატი ლიდერობს


ხობის  #66 საარჩევნო ოლქში, სადაც 32 უბანია და ამომრჩეველთა რაოდენობა 29 422–ს შეადგენს, 1 ოქტომბრის პარლამენტის არჩევნებზე მონაწილეობა 18 643–მა მოქალაქემ მიიღო. ამ დროის მონაცემებით, ლიდერობს მმართველი პარტია, რომელმაც 10 165 ხმა მიიღო, რაც 54,53%–ს შეადგენს. ბლოკის „ერთიანი ნაციონალური მოძრაობა–მეტი სარგებელი ხალხს“ მაჟორიტარმა, გოდერძი ბუკიამ  10088 ხმა მიიღო. ეს 54,12%–ია.

რაც შეეხება ბლოკს „ბიძინა ივანიშვილი–ქართული ოცნება“, ხმების რაოდენობა 6604-ით განისაზღვრა. ეს მონაცემი 35,42%–ია. კოალიციის მაჟორიტარი დეპუტატობის კანდიდატმა გიგა ბუკიამ მიიღო კი  6422 ხმა, რამაც 35% შეადგინა.

დანარჩენ ამომრჩეველთა ხმები „გიორგი თარგამაძე–ქრისტიან–დემოკრატიულ მოძრაობაზე“, „ლეიბორისტულ პარტიაზე“, „ახალ მემარჯვენეებსა“ და „თავისუფალ საქართველოზე“ გადანაწილდა.

ხობის #66 საარჩევნო ოლქის თავმჯდომარის, მინდია ლომაიას განცხადებით, საოლქოში მხოლოდ ერთი საჩივარი დაიწერა „ახალი თაობა ახალი ინიციატივის“ მიერ, რომელიც #11 და #25  უბნებზე არასაკმარისი რაოდენობის ბიულეტინის ფაქტს შეეხებოდა. მინდია ლომაიამ აღნიშნა, რომ სხვა უბნებზე მხოლოდ უმნიშვნელო დარღვევები დაფიქსირდა. 

21.08.2012

ხობის მაჟორიტარი დეპუტატობის კანდიდატი კვლავ გოდერძი ბუკიაა [Video]


     ხობის მუნიციპალიტეტის სოფელ ახალხიბულაში საქართველოს პარლამენტის თავმჯდომარემ ხობის მაჟორიტარი დეპუტატობის კანდიდატად მოქმედი მაჟორიტარი დეპუტატი, გოდერძი ბუკია წარადგინა. დავით ბაქრაძემ ახალხიბულაში ძროხების ფერმა დაათვალიერა და განაცხადა, რომ მსგავსი ფერმები მნიშვნელოვანია მუნიციპალიტეტისთვის, გოდერძი ბუკია კი მეცხოველეობის განვითარებას და ახალი ფერმების ამოქმედებას შეუწყობს ხელს. პარლამენტის თავმჯდომარის თქმით, მათი ძირეული პრიორიტეტი სოფლის მეურნეობაა, მაჟორიტარი დეპუტატობის კანდიდატი კი ხელმეორედ გამარჯვების შემთხვევაში ამ დარგის განვითარებაზე იზრუნებს.

    თავის მხრივ, გოდერძი ბუკიამ დავით ბაქრაძეს მადლობა გადაუხადა ნდობისთვის. მისი თქმით, ხობის ეკონომიკა დღეს ძლიერია, თუმცა მომდევნო წლებში კიდევ უფრო განვითარდება. ასევე, „ერთიანი ნაციონალური მოძრაობის“ ხობის მაჟორიტარი დეპუტატობის კანდიდატის განცხადებით, იგი ხობისთვის პრიორიტეტული პროექტების განხორციელებაზე იზრუნებს.

ცნობისთვის, გოდერძი ბუკია სამი მოწვევის პარლამენტის წევრი იყო.