ხობის მაჟორიტარი დეპუტატობის კანდიდატი კვლავ გოდერძი ბუკიაა [Video]

     ხობის მუნიციპალიტეტის სოფელ ახალხიბულაში საქართველოს პარლამენტის თავმჯდომარემ ხობის მაჟორიტარი დეპუტატობის კანდიდატად მოქმედი მაჟორიტარი დეპუტატი, გოდერძი ბუკია წარადგინა. დავით ბაქრაძემ ახალხიბულაში ძროხების ფერმა დაათვალიერა და განაცხადა, რომ მსგავსი ფერმები მნიშვნელოვანია მუნიციპალიტეტისთვის, გოდერძი ბუკია კი მეცხოველეობის განვითარებას და ახალი ფერმების ამოქმედებას შეუწყობს ხელს. პარლამენტის თავმჯდომარის თქმით, მათი ძირეული პრიორიტეტი სოფლის მეურნეობაა, მაჟორიტარი დეპუტატობის კანდიდატი კი ხელმეორედ გამარჯვების შემთხვევაში ამ დარგის განვითარებაზე იზრუნებს.

    თავის მხრივ, გოდერძი ბუკიამ დავით ბაქრაძეს მადლობა გადაუხადა ნდობისთვის. მისი თქმით, ხობის ეკონომიკა დღეს ძლიერია, თუმცა მომდევნო წლებში კიდევ უფრო განვითარდება. ასევე, „ერთიანი ნაციონალური მოძრაობის“ ხობის მაჟორიტარი დეპუტატობის კანდიდატის განცხადებით, იგი ხობისთვის პრიორიტეტული პროექტების განხორციელებაზე იზრუნებს.

ცნობისთვის, გოდერძი ბუკია სამი მოწვევის პარლამენტის წევრი იყო.

ხობის მაჟორიტარი დეპუტატი მოსახლეობას სოფლის მეურნეობასა და მომავალ პროექტებზე ესაუბრა

ხობის მაჟორიტარი დეპუტატი გოდერძი ბუკია, დღეს სოფელ გურიფულის მოსახლეობას შეხვდა და მათი პრობლემები მოისმინა. მან ჯანდაცვის ხელმისაწვდომობაზე, სოფლის მეურნეობის განვითარებასა და იმ პროექტებზე ისაუბრა, რომლებიც ხობში უახლოეს მომავალში განხორციელდება. მაჟორიტარი დეპუტატის თქმით, ხობში სულ მალე დაიწყება სიმინდის ქარხნის მშენებლობა, სადაც ზეთის წარმოება მოხდება. მისივე თქმით, ამ მშენებლობაზე 500-მდე ადგილობრივი დასაქმდება, ხოლო ქარხანის გახსნის შემდეგ შეიქმნება უამრავი სამუშაო ადგილი.

"შემოვა შვეიცარული კომპანია და გლეხს სიმინდის რეალიზაციაში აუცილებლად შევუწყობთ ხელს. ჩვენ ხალხი უნდა მოვამზადოთ ამ სამუშაო ადგილებისთვის. ისინი უნდა იყვნენ გადამზადებულები და სერთიფიცირებულები. ხობში სამუშაო ადგილის პრობლემა არ იქმნება" - აცხადებს გოდერძი ბუკია.

თავის მხრივ, გურიფულის მოსახლეობამ შიდა გზების რეაბილიტაცია და სასმელი წყლის პრობლემის მოგვარება მოითხოვა.

ბუკიამ ადგლობრივებს განუმარტა, რომ სასმელი წყლის პრობლემის მოსაგვარებლად, ადგილობრივი ბიუჯეტიდან უკვე გამოყოფილია 30 ათასი ლარი, ხოლო მომდევნო წელიწად-ნახევარში ხობში ყველა შიდა გზას მოაასფალტებენ.

ასევე, გოდერძი ბუკიამ მოსახლეობასთან შეხვედრისას აღნიშნა, რომ სოფელ პირველ მაისში მშენებარე მონასტრის კურთხევა, სავარაუდოდ სექტემბრის თვეში იგეგმება. მისივე თქმით, ეს იქნება ერთადერთი ადგილი დასავლეთ საქწართველოში, სადაც პატრიარქს რეზიდენცია ექნება.

„მემარჯვენეების“ ხობის მაჟორიტარობის კანდიდატი ხობის პრობლემებზე საუბრობს

17.08.2012

„მემარჯვენეების“ ხობის მაჟორიტარი დეპუტატობის კანდიდატმა კახა ლატარიამ ორგანიზაციის ზუგდიდის ოფისში დღეს ბრიფინგი გამართა. კახა ლატარიას თქმით, ხობის მუნიციპალიტეტში მცხოვრებ მოსახლეობას არ აქვს გზა, გაზი და სასმელი წყალი. „ერთ დღეში ვერ მოხდება ყველა სოფლის გზის შეკეთება, მაგრამ ხობის მუნიციპალიტეტში ერთი სოფლის გზაც არ არის მოწესრიგებული“. – განაცხადა მაჟორიტარი დეპუტატობის კანდიდატმა. მისივე თქმით, ხობის მუნიციპალიტეტის პრობლემების მოუგვარებლობა ადგილობრივი ხელისუფლებისა და  ამჟამინდელი მაჟორიტარი დეპუტატის გოდერძი ბუკიას უმოქმედობის შედეგია. 

გიგა ბუკიამ „ქართული ოცნების“ საარჩევნო კამპანია ხობში ოფიციალურად დაიწყო

13.08.2012

პოლიტიკური კოალიცია „ქართული ოცნების“ ხობის მაჟორიტარი დეპუტატობის კანდიდატმა, გიგა ბუკიამ ოფიციალური საარჩევნო კამპანია ახალგაზრდული ორგანიზაციის წევრებთან ერთად ქალაქში ფლაერების დარიგებით დაიწყო.

„საინფორმაციო ბუკლეტებში ნათქვამია, რომ საქართველოს მსგავსად, ხობშიც მძიმე სოციალური და რეპრესიული მდგომარეობაა. არიან ადამიანები, რომლებსაც აქვთ სურვილი, ჩაერთონ კოალიციასთან ერთად გამარჯვებისთვის ბრძოლაში. ჩვენ არჩევნების გზით უნდა შევძლოთ ხელისუფლების შეცვლა“, – განაცხადა გიგა ბუკიამ.

კოალიციის მაჟორიტარი დეპუტატობის კანდიდატის ინფორმაციით, ისინი აქციას სოფლებშიც გააგრძელებენ. 

"ცოტნეობის" სადღესასწაულო წირვას პოლიტიკოსებიც დაესწრნენ

   

ხობის ღვთისმშობლის მიძინების სახელობის დედათა მონასტერში, "ცოტნეობის" დღესასაწაულთან დაკავშირებით წირვა ჩატარდა. წირვაზე მყოფმა კოალიცია „ქართული ოცნების“ მაჟორიტარი დეპუტატობის კანდიდატმა გიგა ბუკიამ და „ერთიანი ნაციონალური მოძრაობიდან“ ამჟამინდელი პარლამენტის წევრმა გოდერძი ბუკიამ, მონასტერში არსებულ დადიანების საძვალესთან სანთლები დაანთეს.

  წირვის დასრულების შემდეგ, ხობისა და ფოთის მიტროპოლიტმა მეუფე გრიგოლმა მიმდინარე პოლიტიკურ პროცესებზე ისაუბრა და მრევლს სიმშვიდისა და მითმინებისაკენ მოუწოდა.

ხობში საარჩევნო უბნების მისამართები დაზუსტდა

ხობის #66 საოლქო საარჩევნო კომისიამ საარჩევნო უბნების საზღვრები და მასში შემავალი შენობა – ნაგებობების ნუსხა დააზუსტა. ამის შესახებ დღეს საოლქო საარჩევნო კომისიის მორიგ სხდომაზე იმსჯელეს. აღნიშნულ საკითხს მხარი არ დაუჭირა კომისიის ორმა წევრმა ოპოზიციური პარტიებიდან კონსერვატიული პარტიის წარმომადგენელმა კახა ბენიძემ და „მრეწველობა გადაარჩენს საქართველოს“ წევრმა შორენა ცქირიამ, თუმცა რა იყო მათი გადაწყვეტილების მიზეზი, ამის შესახებ საოლქო კომისიის წევრებმა „ლაივპრესს“კომენტარზე უარი განუცხადეს.

საოლქო საარჩევნო კომისიის თავმჯდომარის მამუკა ლომაიას თქმით, საარჩევნო ოლქში 32 საარჩევნო უბანია. თითოეულ უბანზე, ამომრჩეველთა რაოდენობა 1500 – ს არ უნდა აღემატებოდეს. მისივე ცნობით, ხობში 29 ათას 497 ამომრჩეველია. სიების დაზუსტების პროცესი 28 აგვისტომდე გაგრძელდება.

ხობის #66 საოლქო საარჩევნო კომისიის მორიგი სხდომა 16 აგვისტოს გაიმართება.

აგვისტოს ომის კვირეულის ფარგლებში ღონისძიებები ხობშიც მიმდინარეობს

ხობში 2008 წლის საომარი მოქმედებების დროს დაღუპული 9 დაღუპული, 7 რეზერვისტი, პოლიციელი და მშვიდობიანი მოქალაქე გაიხსენეს. ადგილობრივი ხელისუფლების წარმომადგენლებმა და მოსახლეობამ პატივი მიაგო მათ ხსოვნას და მემორიალი ყვავილებით შეამკეს. საღამოს თეატრის წინ დამონტაჟდება ეკრანი და ომის დროს ხობში განვითარებული მოვლენების შესახებ ვიდეომასალას წარმოადგენენ, სადაც მოქალაქეები ანთებული სანთლებით ხელში შეიკრიბებიან. ასევე ხობში აგვისტოს ომის კვირეულის ფარგლებში დაღუპული რეზერვისტის, გოგა ჭითანავას სახელობის ტურნირი მიმდინარეობს ფეხბურთში, რომელიც უკვე მეოთხე წელია ტარდება.

21 წლის ვასიკო ბუკია კოლხეთის დასახლებაში იპოვეს

21 წლის ვასიკო ბუკია, რომელსაც ხობის მუნიციპალიტეტის გამგეობის სამაშველო ჯგუფები მდინარე ხობისწყალში დღეს დილიდან ეძებდნენ, ხობის მუნიციპალიტეტის კოლხეთის დასახლებაში იპოვეს. ახალგაზრდა ამ დროისთვის საკუთარ სახლში იმყოფება და მის ჯანმრთელობას საფრთხე არ ემუქრება. ხობის მუნიციპალიტეტის გამგეობის სახანძრო დაცვისა და სამაშველო სამსახურის უფროსმა, გოჩა არაჩემიამ „ლაივპრესს“ განუცხადა, რომ ვასიკო ბუკიამ დღეს 04:55 საათზე თავად დაურეკა საგანგებო სიტუაციების მართვის ცენტრს, „112“- ს და განაცხადა, რომ თვითმკვლელობის მიზნით მდინარეში გადახტომას აპირებდა. ადგილზე მისულ სამაშველო ჯგუფებს მდინარე ხობისწყალის ხიდთან ახალგაზრდას ტანსაცმელი დახვდათ, რის შემდეგაც ხობის სამაშველო სამსახურმა მდინარეში დაუყოვნებლივ დაიწყო სამძებრო სამუშაოები. გოჩა არაჩემიას თქმით, ადგილზე მუშაობდნენ ზუგდიდის მუნიციპალიტეტის გამგეობის სამაშველო ჯგუფებიც. სამძებრო სამუშაოებში სამაშველო ჯგუფებთან ერთად აქტიურად იყო ჩართული ადგილობრივი პოლიცია. გოჩა არაჩემიას თქმით, ამ დროისთვის უცნობია, თუ რა მიზნით მოატყუა 21 წლის ვასიკო ბუკიამ საგანგებო სიტუაციების მართვის ცენტრი.

ხობისწყალში 21 წლის მამაკაცს ეძებენ

06.08.2012

ხობის მუნიციპალიტეტის სამაშველო სამსახურის ჯგუფები მდინარე ხობისწყალში 21 წლის ვასიკო ბუკიას ეძებენ. „ლაივპრესის“ კორესპონდენტი ხობიდან იუწყება, რომ ვასიკო ბუკიას ტანსაცმელი დღეს დილით მდინარე ხობისწყალის ხიდთან იპოვეს, რის შემდეგაც სამაშველო სამსახურმა სამძებრო სამუშაოები დაიწყო.

გიგა ბუკია სახელმწიფომ 190 ათასი ლარით დააჯარიმა და ქონება დაუყადაღა.

პოლიტიკური კოალიცია “ქართული ოცნების” მაჟორიტარი დეპუტატობის კანდიდატი ხობში, გიგა ბუკია სახელმწიფომ 190 ათასი ლარით დააჯარიმა და ქონება დაუყადაღა.

”სამი თვის წინ 35 ათასი ლარი კონსერვატიული პარტიის ანგარიშზე ჩავრიცხე, რათა კოალიციას მოხმარებოდა. კონტროლის პალატამ მოწმის სტატუსით დამიბარა და განმარტება მომთხოვა, თუ საიდან მოვიტანე აღნიშნული თანხა. სიტყვიერად ავუხსენი, რომ მაქვს გახსნილი საკრედიტო ხაზი საქართველოს ბანკთან, საიდანაც პირდაპირ გადავრიცხე ეს თანხა”, უთხრა “ლაივპრესს” გიგა ბუკიამ.

კოალიციის მაჟორიტარი დეპუტატობის კანდიდატის თქმით, ის მზად იყო, თუ კი დაინტერესდებოდნენ, ნოტარიულად დამოწმებული დოკუმენტის სახით წარედგინა მათთვის, რა ქონებას ფლობდა. გიგა ბუკია ამბობს, რომ მას შემდეგ კონტროლის პალატაში არ დაუბარებიათ, თუმცა ამ ორგანოს საჩივარის შესახებ შესაბამისი უწყება სასამართლოდან მიიღო. საჩივრის მიხედვით, გიგა ბუკია განმარტავს, რომ მას შემოსავალი არ აქვს, ამიტომაც გაურკვეველია “კონსერვატიული პარტიის” ანგარიშზე ჩარიცხული 35 000 ლარის წარმომავლობა.

“სასამართლოზე წარვადგინე 200 ათასი ლარის თანხის ნოტარიუსით დადასტურებელი დოკუმენტები. მოსამართლემ მე და ჩემს ადვოკატს მოგვცა მხოლოდ 7 წუთი. არაფერი უკითხავთ და ისე გამომიტანეს გამამტყუნებელი განაჩენი. 167 ათასი ლარით დამაჯარიმეს. სააპელაციო სასამართლოში გავასაჩივრე და იქაც არ დააკმაყოფილეს. საბოლოო ჯამში ჯარიმამ 190 ათასი ლარი შეადგინა”, უთხრა “ლაივპრესს” გიგა ბუკიამ.

მაჟორიტარი დეპუტატობის კანდიდატის თქმით, მან დოკუმენტები სტრასბურგის სასამართლოს უკვე წარუდგინა. მანვე განმარტა, რომ სახელმწიფომ ქონება დაუყადაღა და აუქციოზე სახლი 313 740 ლარად გაიყიდა, ეს თანხა ჯარიმის ოდენობას ბევრად აღემატება., აღნიშნა გიგა ბუკიამ. იგი დარჩენილი 120 000 ლარის კოალიციის ანგარიშზე გადარიცხვას ითხოვს. მაჟორიტარი დეპუტატობის კანდიდატმა “ლაივპრესს” უთხრა, რომ მისი საქმის შესახებ არასამთავრობო და საერთაშორისო ორგანიზაციებმა უკვე იციან.

ხობში საპარლამენტო არჩევნებთან დაკავშირებით საოლქო საარჩევნო კომისიის პირველი სხდომა გაიმართა

05.08.2012

ხობის #66 საოლქო საარჩევნო კომისიის თავმჯდომარე მამუკა ლომაიამ საპარლამენტო არჩევნების შესახებ პირველი სხდომა დღეს გამართა.

სხდომაზე საუბნო საარჩევნო კომისიის წევრების შესარჩევი კონკურსის, ამომრჩეველთა რაოდენობის, საარჩევნო კოდექსსა და საარჩევნო უბნებზე მოქმედ ცვლილებებზე ისაუბრეს.

მამუკა ლომაიას თქმით, პოლიტიკურმა პარტიებმა საკუთარი წარმომადგენელი საოლქო საარჩევნო კომისიაში 7 აგვისტომდე უნდა დაასახელონ. ხობის მუნიციპალიტეტში სულ 32 საარჩევნო უბანია, ამომრჩეველთა რაოდენობა კი ბოლო მონაცემებით არის 29 532.

საარჩევნო კომისიის თავმჯდომარემ განმარტა, რომ სიების დამუშავება ამ დრომდე მიმდინარეობს. დღის წესრიგით განსაზღვრული პირველი საკითხი, საარჩევნო კომისიის წევრების შესარჩევი კონკურსის შესახებ ერთხმად დამტკიცდა და ვადა საამისოდ 10 აგვისტომდე განისაზღვრა.

მამუკა ლომაიამ სხდომაზე შეკრებილებს ასევე საარჩევნო კოდექსში შეტანილი ცვლილებები გააცნო. მან პარტიის წევრებს განუმარტა, თავი აარიდონ პარტიის შტაბებსა და მიტინგებზე სიარულს. უბანში კონკრეტული პრობლემების აღმოჩენის შემთხვევაში კი მათ აუცილებლად დაუკავშირდებიან. ლომაიამ მოუწოდა პარტიებს, ერთმანეთს არ დაუპირისპირდნენ.

ცნობისთვის, დღეს გამართულ სხდომას საოლქო საარჩევნო კომისიის 5 მუდმივი და სამი პარტიის თითო წარმომადგენელი, სულ 8 წევრი ესწრებოდა.