კურსორი 30.12.2011

23 დეკემბერი 2011 წელი კურსორი

16.12.2011 -kursori

9 დეკემბერი 2011 წელი-სიუჟეტები-კურსორი

ხობის გამგებელს ორთვიანი წინასწარი პატიმრობა შეეფარდა

ხობის გამგებელს ორთვიანი წინასწარი პატიმრობა შეეფარდა

11.11.2011

ხობის მუნიციპალიტეტის გამგებლის, იგორ ტყებუჩავას დაკავების ფაქტზე, დღეს შსს-ს კონსტიტუციური უსაფრთხოების დეპარტამენტის უფროსის მოადგილემ იოსებ თოფურიძემ სპეციალურ ბრიფინგზე ისაუბრა. თოფურიძის განცხადებით, იგორ ტყებუჩავას ბრალი ედება ქრთამის აღებაში, რაც დანაშაულის დამტკიცების შემთხვევაში 9 წლამდე თავისუფლების აღკვეთას ითვალისწინებს. „იგორ ტყებუჩავამ მეწარმეს, ხობის გამგეობის მიერ ჩატარებულ ტენდერში გამარჯვების სანაცლოდ, ქრთამის სახით გამოსძალა 5 ათასი ლარი“, განაცხადა იოსებ თოფურიძემ ბრიფინგზე. კონსტიტუციური უსაფრთხოების დეპარტამენტმა დღეს გაავრცელა ფარული ვიდეო მასალა, სადაც ჩანს გამგებელის მიერ ქრთამის აღების მომენტი და საუბარი მეწარმესთან ტენდერში მონაწილეობაზე. შეგახსენებთ, ხობის მუნიციპალიტეტის გამგებელი იგორ ტყებუჩავა, 28 ოქტომბერს დააკავეს. ამის შესახებ ინფორმაცია, 29 ოქტომბერს Livepress.ge-მ გაავრცელა. იგორ ტყებუჩავას, სასამართლომ აღკვეთის ღონისძიების სახით ორთვიანი წინასწარი პატიმრობა შეუფარდა. სისხლის სამართლის საქმეს კონსტიტუციური უსაფრთხოების დეპარტამენტი იძიებს. ცნობისთვის: ხობის მუნიციპალიტეტის გამგებლის მოვალეობას მისი მოადგილე გიორგი გაწერელია ასრულებს

9 დეკემბერი 2011 წელი

გოგა ღურწკაიას გამგებლად  დანიშვნა

ხობის მუნიციპალიტეტს ახალი გამგებელი ჰყავს

ხობის მუნიციპალიტეტის გამგებლად გოგა ღურწკაია დაინიშნა. ხობის საკრებულომ გადაწყვეტილება რამდენიმე წუთის წინ ერთხმად მიიღო. გაგებლის პოსტის დასაკავებლად განცხადება სამ კანდიდატს ჰქონდა წარდგენილი. საკრებულოს თავჯდომარემ მამუკა ჭოხონელიძემ სხდომაზე განაცხადა, რომ სამივე კანდიდატი გოგა ღურწკაია, გიორგი გაწერელია და ვილი პაჭკორია "ღირსეული" იყო, თუმცა მან საკრებულოს წევრებს ერთ-ერთი გოგა ღურწკაია წარუდგინა, რომელიც ერთხმად იქნა არჩეული. ოპოზიციური პარტიებიდან საკრებულოს სხდომას მხოლოდ ერთი ”ფრაქცია ხობი დემოკრატების” თავმჯდომარე ესწრებოდა, თუმცა მან დარბაზი გამგებლის არჩევამდე დატოვა. სხდომაზე ხობის ახლადარჩეულმა გამგებლმა გოგა ღურწკაიამ განაცხადა, რომ მისთვის პრიორიტეტულია სოფლის მეურნეობის განვითარება. ”ბევრი პროექტი მაქვს სოფლის მეურნეობის განვითარების კუთხით შემუშავებული. განვითარების საქმეში ადგილობრივი მოსახლეობის ჩართვას ვგეგმავ”, განაცხადა გამგებელმა. გოგა ღურწკაია გაერთიანებული წყალმომარაგების კომპანიის ქვემო-ქართლის რეგიონის მენეჯერის მოადგილედ მუშაობდა. ის ასევე არის ზუგდიდის მუნიციპალიტეტის საკრებულოს დეპუტატიც. შეგახსენებთ, ხობის მუნიციპალიტეტის გამგებელი იგორ ტყებუჩავა 28 ოქტომბერს ქრთამის აღების ბრალდებით დააკავეს. ხობის მუნიციპალიტეტის საკრებულომ გამგებლის თანამდებობაზე ვაკანსია 25 ნოემბერიდან 7 დეკემბერამდე გამოაცხადა.

ხობის გამგებლის ასარჩევად საკრებულო მომავალ კვირაში შეიკრიბება

ხობის მუნიციპალიტეტის გამგებლის თანამდებობაზე გამოცხადებული ვაკანსიის ვადა დღეს 18 საათზე იწურება. ხობის საკრებულოს თავმჯდომარემ მამუკა ჭოხონელიძემ „ლაივპრესს“ განუცხადა, რომ ამ დროისთვის სულ ორი განცხადებაა შესული, საკრებულოს სხდომას კი მომავალ კვირაში მოიწვევს. შეგახსენებთ, გამგებლის თანამდებობაზე ვაკანსიის გამოცხადებას წინ უძღოდა ხობის გამგებლის იგორ ტყებუჩავას დაკავება.

ხობში მცხოვრები დევნილები ახალ საცხოვრებელს ითხოვენ

05.12.2011

     ხობის ყოფილი რაიკომის შენობაში მცხოვრები აფხაზეთიდან დევნილი 13 ოჯახი, კორპუსში არსებული უმძიმესი საყოფაცხოვრებო პირობების გამო, ფოთის ახალ რაიონში ჩასახლებას ითხოვს. ახალი საცხოვრებლით დაკმაყოფილების მოთხოვნით დევნილებმა, წერილობით მიმართეს ლტოლვილთა რეგიონულ სამმართველოს და სამინისტროს, რაზეც მათივე ცნობით, დადებითი პასუხი მიიღეს. „16 აგვისტოს მიღებული შეტყობინების თანახმად, ჩვენ ახალ რაიონში უნდა ჩავესახლებინეთ, თუმცა ამ დრომდე, ჩვენთვის გაურკვეველი მიზეზით ჭიანურდება ეს პროცესი. გაგვაგებინონ, გვასახლებენ თუ გვტოვებენ. დავიღალეთ ერთი უწყებიდან მეორეში გადამისამართებით“, - ამბობს აფხაზეთიდან დევნილი კარლო აბშილავა. თავის მხრივ, ხობში, ლტოლვილთა სამმართველოს უფროსი, შორენა ძაძამია ამბობს, რომ „მას შემდეგ, რაც გამგეობას ყოფილი რაიკომის შენობა სამსახურების განსათავსებლად დასჭირდა, ლტოლვილთა სამინისტროს წერილობით შეატყობინეს დევნილები სხვა საცხოვრებელში, რომ გადაეყვანათ. „სამწუხაროდ, მათ კატეგორიული უარი განაცხადეს ხობში რეაბილიტირებულ შენობებში შესახლებაზე. ისინი ფოთში, ახალ რაიონში ჩასახლებას ითხოვდნენ. შეთანხმება სამინისტროსთან შედგა. სამწუხაროდ, მაშინ დროულად ვერ მოხერხდა. ამ დღეებში მათი გაყვანა მოხდება“, ამბობს შორენა ძაძამია.

სიუჟეტი: მიხეილ იოსავას სახელობის ტურნირი 23.11.2011

25.11.2011

11/11/2011

ხობელი დევნილები მოატყუეს

25 ოქტომბერი 2011 წელი

     ხობში, ყოფილი რაიკომის შენობაში ოცი წელია აფხაზეთიდან დევნილი 13 ოჯახი გაუსაძლის პირობებში ცხოვრობს. შენობის სახურავი ქარმა დააზიანა და წვიმის დროს ოთახები წყლით ივსება, იატაკი აყრილია. აღნიშნული შენობა ეკონომიკის სამინისტრომ ხობის მუნიციპალიტეტის გამგეობას გადასცა. რამდენიმე თვის წინ დევნილების გასახლების საკითხი დადგა, თუმცა მათ ხობის ტერიტორიაზე ალტერნატიული საცხოვრებელი ფართით დაკმაყოფილება არ ისურვეს. ისინი ფოთში, ახალ რაიონში ითხოვდნენ ჩასახლებას. ამ მოთხოვნით მათ წერილობით მიმართეს დევნილთა რეგიონულ სამსახურს და სამინისტროს, რაზეც დადებითი პასუხი მიიღეს. დევნილების თქმით, სამინისტროს მიერ მოცემული პირობა ამ დრომდე შესრულებილი არაა. იძულებით გადაადგილებული პირები შესაბამის უწყებას გულგრილობაში ადანაშაულებენ.

 "16 აგვისტოს რეგიონული დევნილთა სამსახურიდან მიღებული შეტყობინებით, ჩვენ ფოთში, ახალ რაიონში უნდა ჩავესახლებინეთ, თუმცა ამ დრომდე ჩვენთვის გაურკვეველი მიზეზების გამო ჭიანურდება ეს პროცესი. გვატყუებენ და ტყუილს ბოლო არ უჩანს. გაგვაგებინონ მაინც, გვასახლებენ თუ აქ გვტოვებენ. ბევრჯერ მივმართეთ ზემოთ აღნიშნულ უწყებებს მაგრამ უშედეგოდ. დავიღალეთ ერთი უწყებიდან მეორე უწყებაში გადამისამართებით. ეს ყველაფერი რეგიონული დევნილთა სამსახურის უფროსის ლევან მიქავას ბრალია, რომელიც კაბინეტში ვერასდროს გამოვიჭირეთ. უკვე ზამთარია, აცივდა. რისი გადატანაც შეუძლებელი იყო, გავყიდეთ, დავრჩით ჩემოდნებზე შემომჯდარი. სიმართლის გარკვევა გვინდა"-გვითხრა აფხაზეთიდან დევნილმა კარლო აბშილავამ.

აღშფოთებას ვერ მალავს დევნილი კლარა გელაშვილიც: "დღემდე გაურკვეველ სიტუაციაში ვართ. შენობა ავარიულია და აქ ცხოვრება შეუძლებელია. ნაადრევად დაგვიზამთრდა, გასახლების მოლოდინში შეშის ღუმელი გავასაჩუქრე. ახლა მეშინია, რომ პირობას არ შეასრულებენ და ფოთში არ ჩაგვასახლებენ. გავიგეთ, რომ ახალ რაიონში თავისუფალი ფართი უკვე არ არის. არ ვიცი, ეს რამდენად სწორი ინფორმაციაა, შესაძლებელია ეს გასაჩუმებლად გვითხრეს".

ხობის დევნილთა სამსახურში გვითხრეს, რომ აღნიშნული შენობიდან დევნილთა გასახლება რამდენიმე დღეში მოხდებოდა. "მას შემდეგ, რაც გამგეობას აღნიშნული შენობა სამსახურების განსათავსებლად დასჭირდა, ლტოლვილთა სამინისტროს წერილით მიმართა, რათა იქ მცხოვრები დევნილები ალტერნატიულ ფართებში განეთავსებინა. სამწუხაროდ, იქ ჩასახლებული დევნილები კატეგორიული წინააღმდეგი იყვნენ ხობში რეაბილიტირებულ შენობებში შესახლებაზე. ისინი ფოთში, ახალ რაიონში ჩასახლებას ითხოვდნენ. შეთანხმება სამინისტროსთან შედგა. სამწუხაროდ, ეს დროულად ვერ მოხერხდა. ჩვენ მუდმივი კონტაქტი გვაქვს სამინისტროსთან და ამ დღეებში მათი გაყვანა მოხდება"  - გვითხრა ხობის იძულებით გადაადგილებულ პირთა სამასახურის უფროსმა შორენა ძაძამიამ.

ამ კომენტარის შემდეგ რამდენიმე დღე გავიდა, მაგრამ დევნილები ისევ იქ ცხოვრობენ. როგორც გავარკვიეთ, ახალ რაიონში უკვე თავისუფალი ფართი არ არის. სანამ ხობში მცხოვრები დევნილების ჩასახლებას გადაწყვეტდნენ, მანამ რამდენიმე ოჯახი სვანი დევნილები ჩამოასახლეს. როგორც ჩანს, ხობელები სვანებით შეცვალეს, დევნილებს კი ახალი განცხადებების დაწერა მოთხოვეს ახალი ალტერნატიული ფართების მოთხოვნით. იძულებით გადაადგილებული პირები პოზიციების დათმობას არ აპირებენ. როგორ დასრულდება დავა, ჯერ გაურკვეველია.

იგივე მდგომარეობაშია სოფელ ახალსოფელში, ყოფილი სანატორიუმის შენობაში მცხოვრები აფხაზეთიდან დევნილი 5 ოჯახი. ეს შენობა კერძო საკუთრებაშია. მესაკუთრე კი დევნილებს ობიექტის დატოვებას თხოვს. "სასწრაფოდ მოვითხოვ აღნიშნული შენობიდან დევნილების გასახლებას ან სამინისტრომ კომპესაცია გადამიხადოს. აღნიშნული მოთხოვნით რამდენიმე წელია შესაბამის უწყებებს მივმართავ. სამინისტროს ამ შენობის შესყიდვაც კი ვთხოვე, მაგრამ უარი მივიღე. ოცი წელია ასეთ დღეში ვარ. გამკითხავი არავინაა. შენობის დაცლა წლის ბოლომდე არ მოხდა. ადამიანის უფლებათა დამცველებს მივმართავ" - გვითხრა შენობის მეპატრონემ ლევან ქავთარაძემ. შენობა ავარიულია და იძულებით გადაადგილებულ პირებს ცხოვრება უკიდურეს პირობებში უწევთ. როგორც დევნილები განმარტავენ, ხელისუფლებისგან დაპირება მიიღეს, რომ ფოთში აშენებულ ახალ კორპუსებში საცხოვრებელი ფართით დაკმაყოფილდებოდნენ, მაგრამ, როგორც ამბობენ, ეს დაპირება არ შესრულდა. ხობის დევნილთა სამსახურში განმარტავენ, რომ ფოთში ახალ რაიონში ჩასახლება მათი ფუნქცია არაა.

ჩვენ მივმართეთ რეგიონულ დევნილთა სამსახურის წარმომადგენელს სამეგრელოში ლევან მიქავას, რომელმაც კომენტარისგან თავი შეიკავა და პრესცენტრისკენ გადაგვამისამართა.

მაია ძაგანია

გაზეთი ”მთავარი თემა სამეგრელოში”

ხობში წინაგოლის სკოლა დაიხურება

ხეთის პირველი საჯარო სკოლის მასწავლებელმა livepress.ge-ს შეატყობინა, რომ სოფელ ხეთაში არსებული პირველი და მეორე საჯარო (წინაგოლის) სკოლებიდან ერთერთის დახურვა იგეგმება. მისივე ცნობით, ორივე სკოლის დირექტორი თანამდებობიდან გაათავისუფლეს და მასწავლებლებს არ ეუბნებიან, თუ რომელი სკოლა დაიხურება. პედაგოგის ინფორმაციით, იგეგმება მასწავლებელთა შემცირებაც. სკოლებში ჯერ არ იციან, თუ ვინ იქნება ხეთის „გაერთიანებული“ სკოლის ახალი დირექტორი. ვითარებაში გასარკვევად livepress.ge განათლებისა და მეცნიერების სამინისტროს პრესსამსახურს დაუკავშირდა. უწყებიდან მიღებულ პასუხს უცვლელად გთავაზობთ: „სწავლა-სწავლების პროცესის უკეთ წარმართვის, ამასთან, ინფრასტრუქტურის გაუმჯობესების მიზნით, მიმდინარეობს ხობის მუნიციპალიტეტის სოფელ ხეთის და სოფელ წინაგოლის სკოლების ოპტიმიზაცია. ოპტიმიზაციის შედეგად ხობის მუნიციპალიტეტის წინაგოლის საჯარო სკოლა, რომელშიც მხოლოდ 78 მოსწავლე სწავლობს ხეთის მუნიციპალიტეტის საჯარო სკოლას შეუერთდება (ხეთის საჯარო სკოლაში 283 მოსწავლე სწავლობს). შესაბამისად, ოპტიმიზაციის შედეგად გამოთავისუფლებული თანხები სკოლაში თანამედროვე სასწავლო გარემოს შექმნას მოხმარდება. ოპტიმიზაციის შემდეგ მაქსიმალურად იქნება გათვალისწინებული თითოეული მაღალკვალიფიციური მასწავლებლის ინტერესი. რაც შეეხება დირექტორს, ხეთის საჯარო სკოლის დირექტორის მოვალეობის შემსრულებლის ვინაობა ცნობილი სკოლების ოპტიმიზაციის შემდეგ გახდება“, ნათქვამია Livepress.ge-სთვის გამოგზავნილ წერილში

წყალდიდობამ ხობის მოსახლეობა დააზარალა

 ხობის მუნიციპალიტეტში ძლიერმა წვიმამ წუხელ, მოსახლეობის საცხოვრებელი სახლების პირველი სართულები დატბორა. იტყობინება livepress.ge-ს ხობელი კორესპოდენტი, ადიდებულმა მდინარეებმა და ღელეებმა, სანიაღვრე არხები დააზიანა. ხობში მობილიზებულია სამაშველო სამსახური, ზარალის ზუსტი ოდენობის შესახებ ინფორმაციას ამ ეტაპზე სამეგრელო–ზემო სვანეთის სამხარეო ადმინისტარცია არ ფლობს, ხობში იმყოფება გუბერნატორის მოადგილე ვახტანგ ცხადაია, რომელმაც livepress.ge-ს განუცხადა, რომ დატბორილია შუა ქვალონის მოსახლეობის საცხოვრებელი სახლების პირველი სართულები, სასოფლო–სამეურნეო ნათესები, თუმცა წინასწარი ინფორმაციით, უფრო მეტადაა დაზარალებული ნოჯიხევისა და შუა ხორგის მოსახლეობა. ცხადაიას თქმით, გადამცემ ხაზებზე ავარიული გამორთვის შედეგად, ხობს ამ წუთებში ელეტროენერგიაც არ მიეწოდება. მიყენებული ზარალის შესახებ ინფორმაციას მომდევნო გამოშვებაში შემოგთავაზებთ.

ხობში ნავთობსაძიებო სამუშაოებს აწარმოებენ

ხობის მუნიციპალიტეტის სოფელ ჭალადიდსა და შუა ხორგაში ნავთობსაძიებო სამუშაოები მიმდინარეობს. ქართულ–ყაზახური კომპანიის „აქსაი– BMS“ მთავარი გეოლოგის როლანდ ზირაქაძის განცხადებით, ყაზახეთიდან ჩამოტანილი სპეციალური ტექნიკით დაფიქსირებული შედეგები ნავთობის არსებობის ვარაუდს იძლევა. კომპანიის გენერალური მდივნის მოადგილის ერლან ბექტემიროვის თქმით, ამ ეტაპზე მიღებული კვლევის შედეგებს ყაზახეთში გააგზავნიან და დადებითი პასუხის მიღების შემთხვევაში ნავთობსაძიებელი ჭაბურღილების გათხრას დაიწყებენ. კომპანია „აქსაი– BMS“ საქართველოში გეოლოგიურ კვლევებს, ნავთობსაძიებო და მოპოვებით სამუშაოებს 25–წლიანი პროგრამის ფარგლებში 2007 წლიდან აწარმოებს. ამჟამად კომპანიას ხობის მუნიციპალიტეტში დასაქმებული ჰყავს 160 ადამიანი, მათ შორის 120 ადგილობრივი მცხოვრები. ქართულ–ყაზახური კომპანია „აქსაი– BMS“ ნავთობსაძიებელ სამუშაოებს 10 ივნისს დაასრულებს.

ხობში პარლამენტარები ჩავიდნენ

საქართველოს პარლამენტის ვიცესპიკერი მიხეილ მაჭავარიანი ხობის მუნიციპალიტეტში ადგილობრივ მაცხოვრებლებს შეხვდა. ვიცესპიკერი და ხობის მაჟორიტარი დეპუტატი გოდერძი ბუკია სოფელ საჯიჯაოში ჩავიდა და მოსახლეობის პრობლემებს გაეცნენ. livepress.ge-ს ხობელი კორესპონდენტი მაია ძაგანია იუწყება, რომ მოსახლეობის მთავარი პრობლემა უმუშევრობა, სამედიცინო მომსახურების და განათლების ხელმიუწვდომლობაა. მაჟორიტარი დეპუტატი მოსახლეობას წლის ბოლომდე ხუთი ტრაქტორის ჩამოყვანას დაჰპირდა.